ORQANİZMDƏKİ ÜYÜTMƏ
MEXANİZMİ: HƏZM SİSTEMİ
Orqanizmimizin həyat fəaliyyətinin davam etməsi, yəni orqanlarımızın fəaliyyət göstərməsi və hüceyrələrimizin yeniləşməsi üçün zəruri olan əsas maddələri müxtəlif qida maddələrindən əldə edirik. Lakin yediyimiz hər bir qidanın, məsələn, ət, çörək, tərəvəz və ya meyvənin bu əsas maddələrə ayrılması və orqanizm tərəfindən istifadə edilə biləcək vəziyyətə gəlməsi üçün onların çox əsaslı dəyişikliklərdən keçməsi, yəni həzm edilməsi lazım gəlir.
Yeni doğulmuş 2-3 kiloqramlıq körpənin 20-25
ildən sonra 1 metr 80 sm boyunda, 75-80 kq
ağırlığında bir insan olması qidaların həzm
edilməsi ilə bağlıdır. Aradakı bu böyük çəki
fərqinin mənbəyi körpənin qəbul etdiyi qidaların
tərkibində olan maddələrin bir müddət sonra
orqanizmə qatılmasıdır. Bu qidaların bir hissəsi
həyat üçün zəruri olan enerjini təmin edir,
digər hissəsi isə orqanizmə əlavə olunur və
insanın ətinə, sümüyünə çevrilir. İşə yaramayan
lazımsız hissələr isə orqanizmdən kənar edilir.
Həzm sistemi özündə yer üzünün ən yüksək
səviyyəli seçmə (ayırma, çeşidləmə) sistemini
ehtiva edir. Bu çeşidləmə sisteminin içindəki
maddələr əvvəlcə xammala ayrılır, daha sonra isə
bu xammal istifadə edilmək üçün orqanizmin
lazımi yerlərinə göndərilir. Parçalanan maddələr
bir-birindən çox fərqli olduğu kimi ortaya çıxan
yeni maddələr də bir-birindən çox fərqlənirlər.
Həzm sisteminin fəaliyyətini bir neftayırma
zavodunun fəaliyyətinə bənzətmək olar. Bir
neftayırma zavodunda xammal kimi zavoda daxil
olan neft müxtəlif proseslərdən keçərək
mərhələli şəkildə parçalanır və bu vaxt
bir-birindən fərqli məhsullar əldə edilir.
Neftayırma zavodunda baş verən mürəkkəb
proseslər nəticəsində avtomobilimizə enerji
verən benzinlə yanaşı üzərində yeridiyimiz
asfaltın xammalı və istifadə etdiyimiz plastik
məhsullar da istehsal olunur. Eyni zamanda həzm
prosesi nəticəsində də müxtəlif maddələr yaranır.
Lakin həzm sistemində baş verən proseslər bir
neftayırma zavodunda baş verən proseslərdən də
mürəkkəbdir və çox üstün bir fəaliyyət sistemi
sayəsində meydana gəlir. Bundan əlavə, bu
proseslər son texnologiya ilə təchiz edilmiş
neftayırma zavodunda deyil, sizin orqanizminizdə
baş verir. Səhər yeməyində yediyiniz qidalar siz
gündəlik işlərlə məşğul olarkən, məktəbdə dərsə
qulaq asarkən və ya yolda yeriyərkən sizə hiss
etdirilmədən bu nəhəng neftayırma zavodunun
daxilində minlərlə müxtəlif kimyəvi prosesi
yerinə yetirir.
Bu kimyəvi proseslərin baş verməsi üçün uzun bir
kanala ehtiyac var. Kanalın hər bir nöqtəsində
də kanalın içindəki maddələri dəyişdirəcək
xüsusi çeşidləmə sistemlərinin olması lazım
gəlir. Bu kanalın uzunluğu ən azı 8-10 m
olmalıdır.
Lakin insan orqanizmi təxminən 1 m 70 sm-1 m 80
sm uzunluğundadır. Bu halda 10 metrlik bir kanal
sistemi özünün təxminən beşdə biri qədər
uzunluqda olan bir orqanizmin içinə
sığışdırılmalıdır. Şübhəsiz ki, bu da xüsusi bir
sənaye layihəsinin olmasını tələb edir. Belə ki,
insan orqanizmi bu xüsusiyyətlərlə birlikdə
yaradılıb. Haqqında bəhs edilən kanal (ağız,
yemək borusu, mədə, nazik bağırsaq və yoğun
bağırsaq) insan orqanizminin içinə xüsusi bir
plan əsasında yerləşdirilib. Bu planın içində 10
metrlik həzm sistemi 1 m 70 sm uzunluğunda olan
orqanizmin içinə xüsusi diqqətlə yerləşdirilib.
Yeyilən hər bir qida maddəsi orqanizmimizə daxil
olduqdan sonra həzm kanalı daxilində təxminən 10
metrlik bir səfərə çıxır. Bu səfər əsnasında
qidalar bir qrup mexaniki və kimyəvi hadisə ilə
rastlaşırlar. Qidalar beş hissədən ibarət olan
10 metr uzunluğundakı kanaldan sıra ilə keçərkən
bir tərəfdən üyütmə, yoğurma və çalxalama kimi
mexaniki hərəkətlərlə, digər tərəfdən də
müxtəlif ifrazat vəzilərinin bu kanala
buraxdıqları şirələrin kimyəvi təsirləri ilə
həzm edilirlər.
Həzm ağızda başlayıb mədədə və nazik bağırsaqda
davam edir. Qidalarda olan faydalı maddələrin
qan damarları ilə sorulub qan dövranına
qarışması isə nazik bağırsaqlarda baş verir.
Yoğun bağırsaq isə həzm edilməyən faydasız
maddələrdəki suyun sorulub yerdə qalan
qalıqların orqanizmdən kənar edildiyi yerdir.